الاخوة والزملاء... قررت قرارا ارجو منكم ان تساعدونى فيه وهو الترشح فى انتخابات الرئاسة لجمهورية مصر العربية.. والسعى لهذا المنصب ليس حبا فبه والوصول اليه بقدر ان أكون صوتا عاليا لأنقاذ مصر مما وقع بها من تدمير صحى وتعليمى وامنى واجتماعى.. قد اكون مخطئا فى قرارى هذا لذلك اطلب منكم النصح والارشاد فى هذا الامر ..مصر الأن فى حاجة لعقول وحلول وليس شعارات واغلاق للعقول ..



البرنامج الانتخابى


******************




مما لاشك فيه ان فساد الحكومات التى توالت على حكم هذا البلد قد افقدته الكثير من ابسط حقوقه الاجتماعية والصحية والتعليمية.. ووضعه فى ذيل قائمة البلاد النامية برغم امتلاك هذا البلد من امكانيات النمو والتقدم والازدهار فمصر لديها بحران عظيمان وقناة السويس ونهر النيل وحضارة 5 الاف سنة من الاثار وموقع جغرافى فريد بالاضافة الى قوة بشرية هائلة تصدر للخارج.. ولذلك من حق هذا الشعب ان يحصل على تعويض عن هذه السنوات الضائعة ..تعويضا عن سنوات الذل والفقر والجوع والمرض والحرمان من شلة من اللصوص والحراميه نهبوا البلد واستحلوا حرماتها وعرضها واساءو استخدام السلطة والامانة التى ولاها لهم الشعب

صحيا ----- التامين الصحى لكل المصريين بحيث يولد الطفل ومعه كارنيه تأمين صحى.. وحتى يجد كل مواطن طبيبه وعلاجه ودواءه بسهولة داخل المستشفى الذى يتبعه خصخصة المستشفيات فنيا من حيث تحديد تخصص واحد لكل مستشفى مع وجود الاقسام التى تخدمه مثل المعامل والاشعة وقصر كل التخصصات الطبية على المستشفيات الجامعية وبذلك سيجد المريض المستشفى المتخصص فى النسا والولادة او المستشفى المتخصص فى الجراحة اوالمستشفى المتخصص فى الاطفال بسهولة ويسر وبدلا من اللف والبحث عن المستشفيات بسيارة الاسعاف وايضا سيساهم فى اعداد المستشفى اعداد جيد وتجهيزه على اعلى مستوى لانه لن يكون هناك بديل اخر وايضا سيدعم العلاقة بين اطباء الصحة واطباء الجامعة جميع المستشفيات تتبع التأمين الصحى الغاء العلاج على نفقة الدولة الذى شابهه كثير من الفساد واستبداله بأستمارة ترفق بتذكرة المريض موضحا بها ما تم بالنسبة له من عمليات وعلاج ومستلزمات .. الخ ويتم المحاسبة على هذا الاساس اللامركزية بالمستشفيات ولكل مستشفى نقابة تخضع فى عملها للعاملين بالمستشفى وجعل ادارتها مستقلة ماديا وفنيا ومنتخبة من داخل المستشفى وربط العيادات والعمليات بالاطباء من خارج المستشفى وصيدليات خاصة داخل المستشفيات تقنين اوضاع العاملين بالمستشفيات من اطباء وتمريض وعمال واداريين ماليا واجتماعيا وصحيا تحديد وقصر دور المديريات والمناطق الطبية على تجهيز المستشفيات ومتابعة الاداء الادارى والمالى وقصر المحاسبة العلمية والقانونية للاطباء من خلال نقابة الاطباء فقط الاشراف العلمى والطبى من كلية الطب التابع لها المستشفى والتساوى فى حضور المؤتمرات والزيارات والمنح الخارجية * تحسين دخل الطبيب بما يتناسب مع اقرانه العاملين بالخارج وزيادة بدل العدوى ليناسب المخاطر الطبية التى يتعرض لها الاطباء .. ايضا رفع مكافأة نهاية الخدمة بما يتناسب مع المستوى العلمى و طول سنوات الدراسة والدرجات العلمية من ماجستير ودكتوراه التى يحصل عليها الطبيب طول حياته الطبية وتميزه بالمقارنة بالمهن الاخرى الحماية القانونية للمهنة زيادة اعداد الخريجيين من الاطباء والتمريض والفنيين وتأهيلهم على اعلى مستوى وربط سنوات الدراسة والمنهج الطبى بتدريبات ومحاضرات داخل المستشفيات الجامعية

اجتماعيا -------- من حق كل اسرة لها الحق فى تملك ثلاثة افدنة من ارض مصر لا يحق لهم فيها بالبيع او التصرف .. ويكون ذلك بتقسيم الاراضى الغير مستغلة الى مدن هندسية كاملة المرافق وتقسم بين افراد المجتمع بالقرعة من حق كل مواطن تعدى عمره ال35 عاما الا يقل دخله السنوى عن 50 الف جنيه تفعيل مشروع لكل عشرة خريجين صناعى وفنى وعلمى وطبى وتدعيمه من خلال هيئة مستقلة وادارة اموره المالية تخفيض الضرائب وفواتير الكهرباء والمياه والتليفونات وقصرها على الاغنياء الغاء الضرائب على المسكن الخاص وقصره على من يمتلك مسكن اخر تخفيض تعريفة التليفونات المحمولة والنت وجعلها فى متناول البسطاء وكفاية عليهم ما نهبوه فى العهد السابق الغاء مجلس الشورى واستبداله ب مجلس للحكماء يضم كل اطياف المجتمع يقر القوانين وينظم الدستور ويحل المشاكل ويكون نواة لتفريغ المسؤولين فى الدولة من محافظين ووزراء جعل الانتخابات بالقائمة النسبية والغاء نسبة العمال والفلاحين وجعل القائمة تشمل خمسة فى كل دائرة تشمل ثلاثة افراد من احزاب مختلفة وامرأة وشاب لا يتعدى الخمسة والثلاثين من عمره* *الشفافية فى الاعلان عن ميزانية الدولة فى كل الادارات والاعلان عن دخل العاملين بالادارات فى اماكن ظاهرة بما فى ذلك المكافأت والزيادات ووضع حد ادنى واعلى للاجور والتوازن فى صرف المعاشات بما يحقق حياة كريمة *التواصل مع المحالين للمعاش فوق الستين بالمشورة والرأى وبدون مقابل وجعلها خدمة وطنية

تعليميا ------- اولا.. اصلاح التعليم وتطويره من خلال تشكيل لجنة تضم النخبة من كل اطياف المجتمع من العلماء والمثقفين واولياء الامور لوضع خطة وبرنامج تعليمى متكامل يغطى كل المراحل السنية مدارس وجامعات ثانيا..جعل المدارس والجامعات ذات ادارات مستقلة وعلاقتها بالوزارة هى علاقة اشراف ومتابعة فقط وتدير مؤسساتها بنفسها من خلال ادارة منتخبة وذات ميزانية مستقلة وذات برنامج دراسى خاص بها من حيث الوقت وطريقة التدريس والكتاب المدرسى خاص بها وانتظام الدراسة والاجازات والتعينات ثالثا..القضاء على الدروس الخصوصية من خلال وضع خطة لتقييم المدرس والادارى من خلال لجان محايدة مشكلة ومعروفة تضع التصور الامثل للكتاب المدرسى بالتعاون مع الخبراء و تعقد التنافس و المسابقات بين المدارس فى كل النواحى التعليمية والرياضية والفنية والدينية واعطاء لكل حقه من حوافز واجور وتكون على هيئة نقاط وتقرير شهرى يكفل للمعلم حياة كريمة اسوة بباقى اطياف المجتمع جعل التدريس فى المدارس لطلاب كليات التربية والالسن والعلوم والتجارة مادة اساسية رسوب ونجاح وعمل ربط بين هذه الكليات والمدارس اثناء دراسة الطالب الجامعى وبالتالى سيحاول كل طالب بذل اقصى ما عنده لجعل تلاميذه فى افضل حال الاهتمام بالتكنولوجيا فى جميع مراحل التعليم وكمبيوتر امام كل طالب وربط شركات الكمبيوتر العالمية مثل جوجل وميكروسوفت بالمدارس تنفيذ برنامج رياضى متكامل ومبادرة لعبة رياضية لكل طالب واقامة مسابقات تنافسية بين المدارس تحت اشراف الاندية الرياضية الدين لله والوطن للجميع وجعل الكتاب الدينى وامتحانه مقصور على المساجد والكنائس واستبداله بكتاب الاخلاق وبهذا نربط بين المدارس واماكن العبادة ونزيل الاحتقان الدينى الطائفى بين الاطفال فى المدارس رفع كفاءة المدرس علميا وماديا وتقدير المدرس المتميز بما حصل عليه من نقط التميز الاهتمام بالمدارس الفنية التجارية والصناعية والفنية والزراعية والسياحية .. وربطها بالكليات التابعة لها .. وجعل خريجيها لهم الاولوية فى الاتحاق بالكليات التابعةلهم ويليهم خريجى المدارس الثانوية الاهتمام باللغات الاجنبية كمادة اساسية وتخريج دفعات من خريجى الالسن والتربية والحاقهم فورا بالمدارس قانون خاص لتنظيم العمل بالمدارس الخاصة

من هو الدكتور علاء رفاعى









الاسم:علاء احمد على رفاعى

المهنة: طبيب
التخصص: استشارى جراحة ومناظير

من مواليد القاهرة

تاريخ الميلاد: 28 /9/ 1960

العمل السياسى:

اتحاد الطلبة كلية طب عين شمس

الترشح لانتخابات المجلس المحلى النزهة والمرج 2003

الترشح لانتخابات مجلس الشعب عن دائرة النزهة والمرج 2005 مستقل

الترشح لانتخابات مجلس الشعب النزهة والمرج 2010 فئات مستقل

الترشح لانتخابات مجلس الشعب السلام والمطرية وعين شمس والمرج 2011 فئات مستقل

صحفى وطبيب وسياسى معارض بجريدة الشباب الوطنى المستقلة

لا انتمى لأى تيار دينى او سياسى

للتواصل: 01001532012

موقعة الفساد والفاسدين <--------فيديو الرئاسة-----------!>

س و ج رياسة

س..لماذا رشحت نفسك لرئاسة مصر..؟ مصر فى المرحلة القادمة تحتاج رجل قوى له رؤى فى كيفية ادارة الدولة لكى يقودها بالفكر والمنطق والعقل الى بر الامان..فهى تغوص فى صراعات عديدة داخلية وخارجية بين الاسلاميين والمسيحيين والليبراليين والعلمانيين وانهيار فى كل المؤسسات الاقتصادية والامنية.ولقد شاركت فى كثير من الانشطة السياسية منذ ان كنت طالب واستمر نشاطى السياسى من خلال عملى كطبيب ومن خلال نقابة الاطباء والمشاركة فى مجالات سياسية عديدة كناشط سياسى ومعارض وكاشف للفساد. وايضا اثناء الثورة حيث لم نترك عملنا ونقعد فى البيت ولكن كنا نوباتجيين بالمستشفى وكنا نتنقل بعربة الاسعاف لنقل الجرحى والمصابين اثناء حظر التجوال.وشعورى بالاخلاص وحب هذا الوطن هو ما دفعنى بقوة للتحدى بالترشح للرئاسة..

س..انت ك طبيب تمارس عملك فى نطاق ضيق وليس لديك خبرة فى ادارة بلد بأكملها..؟ نعم.. اذا كنت تستطيع ادارة شئون بيتك فأنك قادر على ادارة شئون البلاد .. وبعدين نحن ننظر الى الرئيس القادم كأنه سوبر مان له عدة اذرع ويجب عليه حل كل المشاكل فى ان واحد .. وهنا رأئى ان القيادة هى ان كل وزير وكل مدير هو رئيس جمهورية فى موقعه..له كل الصلاحيات فى ادارة المكان الذى يتبعه و يحكم بقوانين العدل والعقل والمنطق وبدون الرجوع للحاكم..يعنى كمثال ما ادوخش واحد عاير حته ارض يبنى عليها مصنع او مزرعة لكن احل مشكلنه بدون اللجوء الى قيادة اعلى .

يعنى ايه مصر فى حاجة لرجل قوى...!! معنى رجل قولى مش واحد ح يمسك خرزانة ويضرب الناس ولكن معناها انه يقدر يمسك زمام الامور ويسيطر على اى موقف يقابله بالعقل والاقناع .. يعنى مثلا متقوليش اعتصام بالتلت ايام وتقولى حق الاضراب يعنى توقف المصلحة عن العمل اذا كان مستشفى او مصنع او ادارة او غيره .. متقوليش اقطع طريق او سكة حديد وتقولى اعتصام عشان جاموسة ماتت وهى بتعدى.. ..

امال ح تعمل ايه فى الحاجات دى.. ادارات قوية عاقلة منتخبة من هرلاء عشان يبقى معندكش حجة. ماتجبليش حد من بره ويبقى زيتنا فى دقيقنا وناسهم هم اللى يحسبوهم مش الحكومة..وتفعيل القانون على المخطئ.. وننسى اليد المرتعشة .. تطبيق القانون على الصغير والكبير.. متجيش تقول اقطع طريق او اهجم على منشأة واطبطب عليك..زنبه ايه اللى عيان ورايح مستشفى ولا اللى عنده مصلحة وعايز يخلصها ولا عيل عايز يروح مدرسته..والشرطة تنزل الشارع زى الاول ومعنديش حد يقعد فى مكتب و العسكرى يقف فى الشارع زى الصقر والقانون يحميه واللى مش عاجبه وخايف يقعد فى البيت ومش عايزه.. وزى ماقلتلك انا عندى الالاف من رجال اللجان الشعبية وكتيبة من الثوار الجدعان ها يقفوا معايا فى الشوارع والمصانع والمستشفيات..

س.. ما رأيك فى الاحزاب الدينية..؟ احنا بنضحك على بعض.. يعنى ايه حزب دينى يعنى حزب مسلمين ويقابله فى الناحية التانية حزب مسيحى يعنى فرقةوتقسيم بين المصريين ..انا لا اؤيد تواجد الاحزاب الدينية فى السياسة لكن لو الشعب اختارهم اهلا وسهلا وكل واحد يشيل قربته..وانت شايف التناحر بين الاحزاب السلفية والاخوان والشيعة والصوفيين والجماعات الاسلامية يعنى فتنة..وكانت مصر اقوى دولة دينية عندما كان الازهر هو المنبر الاسلامى الوحيد الذى يلتف حوله قلوب المسلمين من جميع انحاء العالم .وانا من رأئى لما البلد تهدى نعمل حوار دينى اسلامى ونلم الناس دى فى عباية واحدة هى عبأءة الازهر وده ها يقوى الاسلام ويزيده قوة..صح ..

ده عن الاحزاب الدينية .. طيب وماذا عن الاحزاب الاخرى وايه رأيك فى العدد الماهول من الاحزاب التى ولدت بعد 25 يناير ..؟ الاختلاف فى الرأى ده شئ صحى ولكن دور على اهداف هذه الاحزاب ح تلاقيها واحدةو هى الحرية والعدالة والديمقراطية والمساواة ومحاربة الفساد طب لما يجتمعوا كل دول فى حزب واحد مش احسن. لكن كل واحد نفسه يبقى زعيم على حساب الوطن .. مع انه من الممكن يبقى رئيس جمهورية وزعيم فى مدة قصيرة وده بالتحالف لكل هذه الاحزاب معا تحت هدف وميثاق وبرنامج واحد ..

س.. ولماذا لم تفعل ذلك..؟ رئيس الجمهورية شئ مختلف فى انه لابد من عدم انتمائه لأى حزب او تيار ليحقق المساواة بين الجميع وذلك لوجود ديانات مختلفة وتيارات كثيرة واديك شايف المرشحين للرئاسة كل يعلن عن برنامجه الانتجابى بصبغة حزبيةودينية..

ولماذا لم تبدأ حياتك السياسية من خلال حزب او جمعية اهلية تحقق فيه افكارك واحلامك المشروع او البرنامج الذى احلم به اكبر من قدرة اى حزب على القيام به .. وانت تعرف ان احزابنا فى الماضى كانت هشة ولا تعبر الا عن نفسها ولا يهمها الا الوصول لمجلس الشعب لمنافع شخصية ..

معلش يعن لا مؤاخذة اللى ها يسمعك ح يقول انك واخد قلم فى نفسك احنا سمعنا فى الاونة الاخيرة عبارات كبيرة وكلام عنترى كتير وان رئيس الجمهورية ده ها يجيب الديب من ديله .. رئيس الجمهورية مش سوبر مان ولا الرجل الاخضر ..رئيس الجمهورية يدير منظومة فيها وزراء ومحافظين ورؤساء مدن وكل يدير موقعه كرئيس جمهورية فى مكانه ويعرض انجازاته وكيفية ادارته لأزماته وتدخل رئيس الجمهورية فى حالات محددة فقط لأتخاذ قررات مصيرية..يبقى الموضوع مش قلم ولا غيره.. القصة هى قدرتك على ادارة منظومة بلد خارجة من فساد ودمار فى كل مؤسساتها والبرنامج المطروح لو قريته برنامج سهل تنفيذه ومش مكلف وعلى قد لحافك مد رجليك..وها يبسط الشعب المصرى وها يعيد كرامته وحريته ويرفع راسه بين الدول بس مع اعادة الثقة للجميع و من غير تخوين..

تفتكر ما هى مهام واختصاصات الرئيس القادم الرئيس القادم لابد ان يكون قويا فى ابداء الرأى وذكيا ايضا يعرف من اين تؤكل الكتف .لا ينحاز الى تكتل معين ولكن يسنقطبه ناحيته بالعقل والاقناع .لا ينساق وراء مغامرة سياسية لا يحمد عقباها ..يعتمد على نائب قوى فى ادارة البلاد اثناء غيابه ومستشارين فى جميع الاختصاصات لمتابعة شئون الدولة له فى كل وزارة ومحافظة لجنة متابعة تتبع رئيس الجمهورية مباشرة..اجتماع دورى مع المحافظين والوزراء اسبوعيا ..متابعة عن قرب مشاريع التنمية لأنها تهم المواطن البسيط .تشكيا هيئة مستقلة من الخبراء فى ادارة الازمات قبل وقوعها الشفافية فى كل شئ يخص البلاد ويعرفها المواطن المصرى قبل غيره .. .

وما هى المشاريع التى سوف تكون اول اهنمامك مشروع الضبعة النووى ومشروع ممر التنمية واستكمال مشروع توشكى برغم اجهاض البعض له ومشاريع التنمية فى سيناء ومشاريع الطاقة الشمسية والطاقة البديلة ونهضة حقيقية فى الزراعة والصناعة ووضع خطة متكاملة للأستفاد من السياحة والبحر الاحمر والمتوسط ونهر النيل ومد جذور التعاون مع البلاد العربية والافريقية ودول الشرق الاقصى مثل كوريا والصين واليابان وايضا دول اوربا وامريكا .

وفى الخارج جعل كل سفارة مصرية فى الخارج هى بمثابة بلدنا مصر وعمل اتصال عن طريق وزارة الخارجية بطريقة الفيديو كنفورانس ويستطيع اى مواطن فى الخارج الاتصال بوزارة الخارجية مباشرة وعدم اهمال مشكلته وخفض البعثات الدبلوماسية ترشيدا للانفاق ولكن مع دعم الاتصال بالدولة الام ومنح السفير المصرى سلطات رئيس الجمهورية فى التعامل مع الدولة المضيفة وقصر سفر رئيس الجمهورية فى القضايا المصيرية فقط واختيار السفراء والدبلوماسيين بأعتناء شديد وحسب الخبرة والسيرة الذاتية والثقافة والقدرة على حل الازمات وحل مشاكل مواطنيه فى الخارج ويجدد تعاقده كل سنتين ليحل غيره من المصريين الاكفاء واعطاء الفرصة للجميع والغاء المحسوبيات والكوسة فى التعيين .

س.. ما رأيك فى المرشحيين للرئاسة ..؟ انا اؤمن بالمناظرة بين المرشحين ..حينها سيكتشف الشعب من هو الصادق ومن هو الامين ومن هو القوى ومن هو الضغيف ومن هو اللى بيضحك عليه ..عمرو موسى مثلا نظام قديم و كان وزير خارجية ايام السادات ومبارك ..ايه رأيك فى الخارجية المصرية وعلاقة مصر بالخارج اتقدمنا زى بقية خلق الله ولا ضعنا فى الرجلين .. ايه رأيك فى جامعة الدول العربية والتى اصبحت جامحة الدول العربية والتى توفيت من زمان واؤكد لك ان ضعف الجامعة العربية هو الذى ادى الى دمار كل هذه الشعوب وانتشار الفساد واستعمارها من جديد ونحن نجنى ثمار ضعفها اليوم ..وبالنسبة ل محمد البرادعى .. ببساطة البلد دى عايزه واحد اكل عيشها اللى ما يتكلش وشرب الميه اللى بتجيب اسهال .. واحد عاش فى بيت ايل للسقوط .. واحد اتزل عشان فرصة يتعلم.. واحد مديون لطوب الارض .. واحد عايش جوه الشعب وعيشة الشعب .. واحد اتظلم ودخل السجن ظلم .. واحد عانى من ظابط او من رئيس فاسد مستبد .. واحد قعد يلف بأبنه او ابوه او امه على المستشفيات لأستخراج علاج على نفقة الدولة .. اما الشيخ حازم صلاح معلش يعنى وبدون زعل ده راجل محترم وداعية دينى محترم لكن سياسيا ها يظلم نفسه قبل البلد وبعدين كفاية علينا الاخوان والسلفيين فى البرلمان وكمان عشان الميزان م يختلش وربنا خلق الحلال مع الحرام فى نفس الوقت ....

س.. ما رأيك فى الحكم الاسلامى..؟ انا مسلم اقيم فى دولة مسلمة دستورها مبنى غلى الشريعة الاسلامية ويحكمها قانون يعيش به المسلم والمسيحى فى حب وسلام .. ولما جه الاستفتاء الشعب اختار.. طب انتم زعلانين ليه.. اتهام الشعب بأنه مضلل اومش فاهم اوتابع او عاطفى هو اتهام لا اقبله.. الشعب اختار ان يحكمه اخوان او سلفيين او جماعات اسلامية فليكن ويجرب ويشوف والصندوق هو الحكم وميدان التحرير موجود وهى رنة واحدة .. اما ان تقف ضد التيار فهذا يؤدى الى اصطدام وفوضى ..

ايه رأيك فى الانقسام الطائفى فى هذه الايام ..!!!! ها اكلمك بصراحة.. الفتنة الطائفية بين المسلم والمسيحى بدأت من كى جى وان فى المدرسة ودعمهاوشد من ازرها المسجد والكنيسة .يعنى لما تيجى حصة الدين نلاقى المدرس بيفصل التلاميذ المسلمين عن المسيحيين وكل مجموعة تقعد فى فصل منفصل وكل يدرس دينه على حده ومحدش منهم عارف التانى بيدرس ايه او بيقول ايه واعتقاد كل منهم ان التانى كافر وها يروح النار وطبعا عدم اغفال دور مدرس الدين فى اشعال الفتنة اكتر واكتر ..وينمو ذلك مع التلاميذ لحد ما يكبروا .يجب ترسيخ مبدأ الدين لله والوطن للجميع . لذلك انا انادى وبشدة على استبدال كتاب الدين بكتاب اسمه الاخلاق يجمع بين الاديان كلها ويعرف الطالب الحقائق الدينية السمحة وعلاقة الانسان بربه و باالاخرين ويضع هذا الكتاب نخبة دينية مختارة بعناية من رجال الازهر والكنيسة و من مجلس الحكماء الذى هو بديل مجلس الشورى .. اما الامتحانات الدينية والمسابقات ف تكون مقصورة على المساجد والكنائس بأعداد جيد من الازهر والكنيسة .. هذا سيربط الطالب منذ نشأته ب مكان العبادة وسيداوم على التواجد فيه واداء فروض العبادة ولو بنسبة 50% وسينتج جيل عارف ربنا ويتجنب المحرمات والبلطجة والاجرام ..واحنا شايفين ان اصلاح اى واحد هو جسم سليم وعقل سليم و دين يدير كل تصرفاته ..

يعنى وداعا للحوار الدينى ..!!!! بالعكس .. من خلال كتاب الاخلاق وعلى مر سنوات الدراسة سيكون لبنة لوضع اسس الحوار والتقارب الدينى بين الطوائف الاسلامية المختلفة من شيعة وسنة وغيره وايضا حوار دينى بنأء بين الديانات الاخرى لنضع بناء الوطن ونهضته هو التقارب ونبذ الخلافات والعيش بسلام وامان جنبا الى جنب وكلنا بنعبد ربنا ولكن بطريقته ومصير اى واحد فينا فى ايد ربنا سواء جنه او نار وليس من سلطة او اعتقاد اى واحد مننا ان يفتى فى حكم الله .. وانا بشبه ده ب عمارة يسكن فيها كل الناس من ديانات مختلفة والكل يدفع الايجار لصاحب العمارة اول كل شهر..

س .. ما رؤيتك فى كيف تكون الدولة..؟ ..قضاء مستقل يحكم بين الناس بالعدل لا يتبع حكومة او مؤسسة .. جيش مصرى مستقل لا يتبع انظمة خارجية .. جمعيات اهلية معتدلة .. احزاب مستقلة .. نقابات مهنية مستقلة .. رئيس جمهورية معروف الصلاحيات.. مجلس الشعب متعدد ما بين اتجاهات اسلامية و اشتراكية و ليبرالية ..

وما هى خريطة الخروج من الازمة من وجهة نظرك! بداية لابد ان نعرف ما هو حجمنا الحقيقى بين الشعوب الاخرى ومحليا ودوليا وبدون زعل .. ما هو حجمنا زراعيا وصناعيا وعلميا واجتماعيا بالمقارنة بالدول الاخرى . نحن نستورد قوت يومنا من القمح ونستورد التكنولوجيا وصناعات ومنتجات الدول الاخرى ..حتى الصين بتصدر لنا الفوانيس والسبح واحنا مدينون لطوب الارض . الدين الخارجى وصل تريليون .انهيار اقتصادى وزراعى وصناعى وايضا سياسى..عندنا بحار ونيل وارض واسعة وشباب زى الفل ومش عارفين نستغل كل ده.. يبقى لازم نعرف نتعامل مع كل ازمة ونحاول نصلحها حتى لو رسيت على ازمة واحدة .. يعنى اللى يقولك نخترع سيارة يبقى بيضحك على نفسه لأنه ما ينفعش دلوقت مع عالم سبقك بحوالى مائة سنة .. يبقى لازم نبدأ من حيث انتهى الاخرون والتعاون مع الاخرون وعدم الاستعلاء ونغمة مصر ام الدنيا وحضارة سبع تلاف سنة اللى ودتنا ورا الترماى ..ومتقوليش ح اجبر الفلاح يزرع قمح الا لو كان هو عنده استعداد وموفر له كل احتياجاته ويضمن يبيع محصوله وما يخسرش . ومتقوليش اشغل عمر افندى واجيب بضاعة ويخسر ومتقوليش احارب اسرائيل واحنا مش قدها .. يا راجل دى الحاجة الوحيدة اللى نجحت فى مصر بالفهلوة هى القمر الصناعى نايل سات وتصنيعه برضه مش تبعنا .. ..

والمعادلة دى تتحل ازاى! الحاجة اللى انت ماسكها فى ايدك ومش حاسس بقيمتها والناس اللى بره بيحسدوك عليها عندك ..السياحة وقناة السويس وقوة بشرية هائلة .. قوللى عملت بيهم ايه ده قناة السويس لوحدها بدل ما السفن تعدى وخلاص ممكن تستغل مرورها وتعمل تبادل تجارى معها بس فين المخ وعندك البشر اللى لو دربتهم كويس ح يغرقوا الدنيا شغل ويرجعولك بالعملة الصعبة .انت عارف فيه حاجة انت مش واخد بالك منها انت عارف ليه مصر مستهدفة والكل بيبص عليها لأنها الدولة الوحيدة اللى الخير مش ها يسيبها الخليج والسعودية ها يخلصوا بترولهم واوروبا والامريكان ها يخلص الاحتياطى بتاعهم وها يدوروا على مصادر اخرى فى البلاد اللى زى حالتنا وانت عندك خزائن الارض من اثار وبحار ونيل وصحراء غنية بخيرتها وقناة السويس بس اللى بيفهم .وبعدين الكل لازم يشارك من اجل انقاذ البلد عشان تقدر تسدد ديونك.. لو كل مصرى فى الخارج تبرع ب 100 دولار ممكن تلم مليار دولار بواقع 6 مليار جنيه وممكن ده فى مقابل بعض الاعفاءات الجمركية لو بصولك فى المئة دولار ..فين اموال صناديق النذور والصناديق الخاصة والتبرعات وزكاة رمضان ..لو كل اب لطالب فى مدرسة يحط 5 جنيه شهريا.. لو كل موظف اتبرع ب 5 جنيه شهريا لقضينا على الانهيار الاقتصادى .بس الموضوع عايز مبادرة مصرية من اجل انقاذ الوطن ..

ما رأيك فى ظهور السلفيين واشتغالهم فى السياسة .. ؟ اولا دعنا نحدد شئ مهم ان السلفيين كان منهجهم ضد التظاهر والخروج على الحاكم اينما كان الا فى حالة واحدة وهى تغيير الديانة .. ولكن معظم السلفيين كانوا فى السجون والمعتقلات ووجودهم الان فى الساحة هو للانتقام او التركمات النفسية السابقة والظلم هو من جعلهم يغيرون منهج حياتهم ويشتغلون بالسياسة .. وهدم الاضرحة وقطع اذن المسيحى ليس من منهجهم بل فعلها بعض السلفيين المتطرفيين واقرب مثال على دلك الشيخ اسامة القوصى الذى اعلن فى جميع الفضائيات تغيير منهجه الذى كان يسير عليه والذى ربى تلاميذه عليه قرابة 20 عاما والمجتمع لا يخلو من المتشديين سواء كانوا مسلمين او مسيحين .. ...

ما رأيك بالنسبة للوضع الامنى الان...!!!! خلينا نتكلم بصراحة..طول ما الشرطة بتخاف تتعامل بالسلاح مع البلطجية مش ح نحس بالامان.. طول ما السلاح مالى البلد مش ح يبقى فيه امان.. هروب الشرطة من ميدان التحرير زرع العصيان فى قلوب الناس..نزول اللجان الشعبية فى الشارع ومعاهم اسلحة ادى الى تهميش دور الشرطة..جراءة البلطجية فى اقتحام الاقسام والسجون وحرقها وسحل الظباط ادى الى الرعب الشديد فى افراد الشرطة. تخيل انت ان ظابط مباحث خد على تعليق الناس من رجليها واقر واعترف وبغدين تلاقيه فى الشارع مجرور على الارض واضرب يا لجدع وفين يوجعك.. لازم نرجع للشرطة هيبتها والقانون يطبق على الجميع ..

طب والحل ايه.!!!! زى ما انا قلت من قبل تقسيم المدينة زى شبرا مثلا الى مقاطعات كل مقاطعة لا يتعدى سكانها 100 الف نسمة او اقل وكل مقاطعة بها جهاز امنى وطنى يضم افراد شرطة وافراد جيش وافراد من المجتمع المدنى من نفس سكان المقاطعة ولهم القدرة على التعامل مع الناس وحل مشاكلهم ونهيئ لهم مكاتب زى قعدات العرب.. وممكن المشكلة تخلص فى قعدة واحدة وبكده الشرطة ح تصدر الناس دول قدام المشاكل لحلها والتعامل مع البلطجية وردعهم ..الحاجة التانية هى احتواء هذه المقاطعات على كل ما يخص التعامل مع الشرطة والقضاء بمعنى مبنى ادارى فيه قسم الشرطة من تحت ورجال القضاء فى الدور الثانى والحجز فى الدور الثالث والاحكام الخفيفة فى الدور الرابع ولا يترك المحكوم عليه المقاطعة الا فى الحكم النهائى الى السجن ونستغنى عن سيارات التراحيل ذات المنظر البشع والغير حضارى ونحد من الاف القضايا التى تنظر بواسطة قاضى واحد وندى فرصة للمتهمين اصحاب المشاكل البسيطة زى الشيكات والخناقات والجواز والطلاق والرؤية, بحل مشاكلهم وفى النهاية ترابط قوى بين الشرطة والشعب وكل واخد حقه ويعمل اللى عليه من حقوق وواجبات .

وبالنسبة للمقاطعات دى ها تقتصر على الشرطة وبس ...!!!! لأ طبعا .احنا وصلنا لمرحلة ان الواحد مبيعرفش جاره اللى ساكن معاه فى نفس العمارة .. والتفكك ده نابع من ان كل واحد بيشتغل فى مكان تانى وعياله مدارسهم فى حتة بعيدة ومتقوليش نعمل مدن سكانية نودى الناس فيها ..ده وهم مش وقته.. معظم الناس ساكنة فى العبور والتجمع الخامس وبتنزل وسط البلد عشان شغلها..طب لما الناس دى تبقى فى مقاطعة واحدة.. مع مرور الوقت الناس دى ح تعرف بعضها وحط فى المقاطعة دى كل ما يخطر على بالك من ادارات ومنشأت واسواق يعنى اعادة تخطيط وادارة هذه المقاطعة من نفس سكانها .ومجالس محليتها من نفس سكانها. وذات ميزانية مستقلة عن الدولة وتدير شؤونها بعيد عن الدولة يعنى تعينات ومرتبات ونظافة وتعاقدات وتشغيل عمالة وتطوير طرق وتعامل مع المحلات والضرائب وانشاء مصانع ومزارع واسواق ..وعلاقتها بالدولة هى الرقابة فقط والعلاقة الادارية بين رئيس المجلس المحلى المنتخب من هذه المقاطعة مع مجافظ عدة مقاطعات مع الوزير مع رئيس الدولة .. وبكده عظمنا من دور المحليات وتركنا مجلس الشعب لأدارة شئون البلاد التشريعى والتنظيمى داخليا وخارجيا.. ..

الاسلوب اللى بتتكلم فيه عن تقسيم الدولة ده حلم من الخيال .!!!! تقسيم ايه.. دى مقاطعة موجودة اصلا .مش ها نخطط ولا ح نجيب ناس من برة . فيها المسلم والمسيحى ومساجد وكنائس ..الفقير والغنى و تبادل خبرات وانتماءو مسابقات بين المقاطعات زى المانيا.. وسينما ومسرح وناس ذات خبرات تدير المقاطعة ورجال امن من نفس سكان المقاطعة يعنى زيتنا فى دقيقنا وهى دى بداية الطريق لبناء مصر الحديثة مش كلام على الورق وخلاص ..

وايه رأيك فى حكم العسكر.!!!! اللى يقول ان المجلس العسكرى موقفش جنب الشعب فى 25 يناير يبقى منافق وما بيشوفش ..ايه اللى يخلى الجيش يحبس مبارك واولاده ..ومبارك مربيهم وكان معاهم ليل ونهار ومعظم القيادات كانت تحت سيطرته .. متقوليش الضغط الشعبى هو السبب .لأ سامحنى ,الجيش المصرى ناس محترمة ومش عايزين يضربوا ويموتوا فى شعبهم واهلهم زى سوريا وليبيا واليمن .. دانة مدفع واحدة تفرق هذا الجمع . طائرة هليكوبتر واحدة ترش الناس دى.كتيبة صاعقة من اللى بياكلوا التعابين تخش على الناس وتؤش وتشيل .لكن الجيش بتاعنا مش دموى.وكلنا مصريين وولادنا هم اللى فى الجيش ..يعنى مينفعش اقتل ابنى واخويا وعمى وابويا الدول التانية مؤجرة مرتزقة من دول اخرى كى تقتل شعبها .وكلنا شفنا بعينا ازاى الدبابات شايلة الناس ومكتوب عليها يسقط مبارك والناس هتفت وقالت الشعب والجيش ايد واحدةواى تخامين او تحاشيش غير كده يبقى عبط ..ولا ننسى القوات المسلحة وتاريخها المصرى والعربى المضئ فى حرب 6 اكتوبر اللى لولا الانتصار فيها على اسرائيل لما كان هؤلاء الثوار فى ميدان التحرير لانه مش ح يكون فيه ميدان.. ولولا حرب الخليج وتحرير الكويت بواسطة الجيش المصرى لأصبحت الكويت فى خبر كان بملكها وشعبها.. يعنى جيش مصر مشرف بكل المقاييس وسيبوا لنا حاجة نعتز ونفخر بيها.. ..

ما جوبتش على سؤالى..!!!! بص يا سيدى عندما نلاقى مصر فيها عدم امان واستقرار وانهيار فى كل شئ وبلطجة وخطف واختصاب وسرقة سيارات وقطع طرق واسلحة وسنج ومطاوى مع كل واحد وتبقى ماشى فى الشارع خايف حد يتعرض لك او لأولادك وياخد اللى معاك فى غياب كامل للشرطة يبقى مفيش حل غير حكم عسكرى واحكام عرفية حتى تستقيم الامور زى اى حتة فى الدنيا..لكن المجلس قرر اجراء انتخابات وحدد موعد لأنتخاب رئيس الجمهورية .. طب ايه المطلوب نديها للبرادعى ولا عمر موسى ولا لعلى أو زيد او عبيد لازم انتخابات حتى يتفق الشعب على واحد ..

يبقى انت كده بتتكلم ضد رغبة الثوار .!!!! الثوار على عينا وراسنا كلنا كنا ثوار يعنى انا كنت ايام الثورة نوباتجى فى المستشفى استقبل المصابين من الثوار وعساكر الشرطة.. يبقى انا ايه ثورى ولا مش ثورى ولا اسيب النوباتجية واروح ميدان التحرير عشان اثبت حضورى فى الدفتر .ومشيت فى مظاهرات كثيرة ترفض الظلم والاستبداد يبقى انا ايه ثورى ولا مش ثورى . الصحفى والمذيع اللى كانوا بينقلوا الاخبار للناس دول ايه.. بلاش كده الاغرب من كده عساكر الجيش اللى حمت الثورة تقول عليهم ايه..نقول للثوار كتر خيركم عملتم الكثير وغيرتم البلد وكل واحد منكم حط اسمه فى لوحة الشرف وسجل اسمه فى التاريخ.. نسيب البلد للناس اللى عندها خبرة فى الاقتصاد والسياحة والسياسة.. وننتظر ونشوف وهى رنة..انما عشان تقولى المجلس العسكرى يسيب البلد فى الوقت ده مش معقول .. طيب اهم الاخوان وصلوا للحكم وه يعملوا الدستور والرئيس هيبقى منهم ها ح تعملوا معاهم ايه ولا ح تطلعوا بمليونية تانية تقول يسقط الاخوان يقوم يرد عليها الاخوان بمليونية تقول يحيا الاخوان وتبقى فوضى .. ارجوكم شغلوا عقولكم شوية واعرفوا ان مصر فى خطر. هذا مخطط لتدمير مصر بعد ما دمروا الشرطة جه الدور على جيش مصر زى ما دمروا العراق وليبيا واليمن وسوريا والبقية تأتى واهى الجامعة العربية بدأت تأكل ولادها ..

وما رؤياك للمشهد السياسى دلوقت.. كفاية علينا لحد كده المشهد واضح ..الثورة قامت وغيرت الاوضاع الى ما كان يتمناه كل مصرى... وكما قلت ان ثورة 25 يناير لم تقم صدفة ولكن سبقها كثير من الوقفات والاعترضات وكان ابرزها رفض التزوير والتوريث وانشاء مجلس الشعب الموازى ساعتها قالها مبارك خليهم يتسلوا.. يبقى كفاية لحد كده لازم نطفى الولعة ونشوف ما تتطلبه المرحلة القادمة.. للثوار شكرا عملتم اللى محدش عمله وكل منكم كتب اسمه فى صفحة تاريخ مصر الشهداء ..مع اعتراضى عن تسمية كل من مات فى الثورة يبقى شهيد تم انشاء هيئة لرعاية المصابين واهل الشهداء.. الانتخابات تمت فى موعدها برغم سرعة استعجالها وسلبيتها..انتخابات الرئاسة ستتم فى موعدها المجلس العسكرى تعهد بتسليم السلطة للشعب فى موعد اقصاه اخر يوليو..اسفرت الانتخابات عن تقدم الاخوان والسلفيين برغم تخوف الكثيرين منهم.ولكن هى ارادة الشعب.وبلاش تخوين للشعب واتهامه بالغياب عن الوعى.واصبحت الجماعة من محظورة الى محظوظة.وبات الحزب الوطنى وانصاره من المنبوزين.. .. نقعد بقى مع من لديهم خبرة و يقعد الشباب مع الكبار عشان ما يبعدوش عن المشهد ونشوف مسار مصر السياسى والاجتماعى والصحى والتعليمى ونبطل التشكيك فى الشرطة والقضاة والمجلس العسكرى البلد مليانة خبرات لازم نستمع لهم ولا نحتكر الرأى والفكر من طرف واحد .. امال ديمقراطية ايه اللى بنتكلم عليها..

ورأيك ايه فى اللى بيهاجم المجلس العسكرى! المجلس العسكرى مش بتاع سلطة ولو كان بتاع سلطة مكنش حبس رئيسه والراجل اللى مربيه هو واولاده وحطهم فى السجن .. المجلس العسكرى امن الانتخابات ومنع البلطجيه انها تبوظ الانتخابات ووعد الناس انه سيعقد فور نهاية الانتخابات اول جلسات مجلس الشعب لوضع الدستور وانتخاب رئيس الجمهورية..يبقى فاضل ايه تانى ..المجلس العسكرى لو كان عايز يتعامل بوحشية من المتظاهرين كان سلط عليهم قوات الصاعقة اللى كنا بنشوفهم بياكلوا التعابين حية وكل واحد يشيل متظاهر ويخلص منهم وعلى الصحراء وارمى لكن المجلس العسكرى يتعامل مع الموضوع بأقصى درجات ظبط النفس اللى الناس مش فهماها ..ومش عاوز يحول البلاد زى ليبيا وسوريا .وزى ما احنا شايفين كل يوم اعتدار واحنا اسفين وانا بالطبع شايف ان ده عيب وانا الوم المجلس العسكرى على تعامله مع الازمة المفتعلة بالاعتذارات وعيب فى حق هذه المؤسسة العسكرية التى نفخر بها وسنظل نفخر بها فأنا قضيت تجنيدى فى المدفعية كطبيب وشوفت مدى تفانى هؤلاء فى الحفاظ على البلاد .

امال ايه اللى اخر تسليم السلطة حتى الان واتهام المجلس العسكرى بعدم الوفاء بتعهده بتسليم السلطة للمدنيين بعد 6 شهور ! هو انتم اديتو فرصة .. ده من بعد 25 يناير واحنا فى اعتصامات ومليونيات ومظاهرات واضرابات وقطع طرق وبلطجة وسرقات وغياب امنى واقتصاد منهار وهروب المستثمرين وارتفاع الدين داخلى وخارجى وحكومات وزارية ما بتلحقش تقعد وواحد منهم كان من التحرير وانتخبه الثوار وشالوه على الاعناق .. يعنى مفيش واحد عاقل يفكر يسلم البلد بالصورة دى . ها تخرب اكتر ..

ومين اللى عايز يخربها ! بص ..كل حاجة بقت ع المكشوف . الثورة قامت وغيرت مصر وكسرت حاجز الخوف عند المصريين واطاحت بالنظام الفاسد لكن اصحابنا فوجئوا بأن ثورتهم اتسرقت منهم بسبب تفككهم وانقسامهم وعدم الخبرة ومين اللى سرقها . الاخوان ..خدوا مجلس الشعب والرئيس ه يبقى منهم واول حاجة ه يعملوها ه يتخلصوا منهم لأنهم اقوى والدليل على كده انهم ما بينزلوش معاهم فى مليوناتهم التحريرية .. عشان كده اصحابنا مش عايزين الانتخابات تتم بأى وسيلة حتى لو ولعوا البلد كلها مش المجمع العلمى ومجلس الشعب فقط ..

يعنى انت بتتهم الثوار بالسعى لخراب البلد ! انا مقلتش كده انا قلت اصحابنا اللى بيولعوا فى البلد اللى عايزين يولعوا وزارة الداخلية ومجلس الشعب واللى حرقوا المجمع العلمى وهم عارفين نفسهم كويس .. ودول بعيدين كل البعد عن الشباب الجدع اللى حمى الثورة ولكن اندس وسطهم المأجورين ..

امال انت زعلان من الثوار ليه ! لما نجحت ثورة 25 يناير فى اقصاء النظام والاطاحة بالرئيس كنا نظن ان للثورة كيان وقائد ولكن فوجئنا ان هذه الثورة ليس لها قائد يتحركون وراءه ووفوجئنا بعدد مهول من الائتلافات تعدى المائتين ائتلاف ومعظمهم هذه الأتلافات لا يعدون على اصابع اليد الواحدة .وكل واحد نزل التحرير ومسك خرطوش او خدله صورة بقى من الثوار .. وبسبب انقسامهم هذا لا يوجد خريطة واضحة لهم او معالم او بيانات بها تستطيع ان تتحدث معهم بدون اختلاف ومعظمهم اصبح نجوم فضائيات ويتسابقون للظهور فى البرامج ويتحدثون بأستعلاء شديد ولا يقبلون النقد من الاخر..واصبح نجوم المجتمع وذوى الخبرة من الكبار فى حجم ضئيل بالنسبة لهم فالمليونيات تشعرهم بالقوة والسلطة والضغط لأسقاط هذا وعزل ذاك ومحاسبة هذا واعدام ذاك وعلى المجتمع ان يستجيب فورا دون تفكير والا سيتمر تواجدهم بالميدان .. كم من قعدات حوار ومؤتمرات وفاق وطنى وكم من جلسات تارة مع الحكومة وتارة مع المجلس العسكرى بدون اى اتفاق والنتيجة فى كل حوار ان من يتحاور لا يمثل الاخرين ولا يتحدثوا بأسم الثورة .. واديك شايف شكل ميدان التحرير بقى عامل ازاى لا يسر عدو او حبيب ..

طيب من وجهة نظرك ما هو دور شباب الثورة ! انا عايز اوضح ان تدمير الشرطة وانكسارها وبعده تدمير الجيش وبعده القضاة سيؤدى بنا الى فوضى ستأكل الاخضر واليابس.. المفروض بقى شبابنا الحلو الجدع يقعد مع الكبار فى حوار العقل حوار الاخلاص للوطن ويمسكوا حاجتين فى البلد وهم اخطر حاجتين .. المجالس المحلية ووزارة الشباب كتجربة للتفاعل مع المجتمع وتنمية قدراتهم على ادارة شئون البلاد وعلى ان يكون هذه المواقع للشباب فقط وبالاخص شباب التحرير وبداية للترابط بين هؤلاء الشباب والمحافظين والوزراء والشعب ..

ايه رأيك فى موضوع الخصخصة.!!!! طبعا انا مع الخصخصة..لكن البيع للمصريين ومش للاجانب وبتسهيلات .والبيع يبقى لناس متميزة فى النهضة الصناعية والتجارية وعنده مصانع ومشاريع كبيرة فى البلد ,ده ها يخاف على مصانعه ومشاريعه وعلى حقوق العاملين فيها لان ده هو رأس ماله. وتأكيد لكلامى شوف شركات العاشر من رمضان و6 اكتوبر والعبور شغالة ازاى بالمصريين لانها ملكهم..طب لو اديت الشركة او المصنع للمستثمر المصرى بنسبة 51% وباقى الاسهم للعاملين فيها.مش ح يبقى احسن .. يعنى لما يبقى عندى شركة زى عمر افندى بتخسر كل يوم عشان اللى بيدوروها ناس معندهاش ضمير وزمم خربانة وايرادها مش مكفى مرتبات العاملين اللى فيها ...لما اديها للعاملين اللى فيها هم اللى يمتلكوها بحصة من الاسهم ويديروها ومعاهم مستثمر مصرى مش ح يبقى احسن وزيتنا فى دقيقنا ..وبكده ناسها ح يخافوا عليها وه يشغلوها ولو وقعت يبقى هم السبب..وقيس على كده باقى شركات البلد.وحط فى دماغك ان ارباح هذه الشركات ها تكفى مرتبات ومكافأت ومعاش وتأمينات بعيدا عن الدولة على شرط ان تدار بمنظومة ادارية ناجحة ونظام يكفل حق العاملين فيها ..

ايه حكاية الديمقراطية ولا قرص الطعمية! تفتكر اى شعب فى الدنيا عايز ايه .. اكل وشرب وصحة وتعليم كويس وحياة كريمة وراحة وامان ورفاهية وعدالة اجتماعية.. وكل ده ضاع فى ظل فساد النظام السابق .. طب لما اجى اطالب بكل ده فى وقت واحد واتظاهر واعتصم اذن انت تطالب بالديمقراطية يعنى حرية التعبير .طب لو توافرت كل وسائل الحياة الكريمة .هل ها تطلع وتطالب ب الديمقراطية ولا لأ .. الاجابة طبعا لأ .. لأن كل شئ توفر لك .. يبقى هنا اول شئ تعمله عشان تسكت الناس بتوعك هو ايه ؟,,الديمقراطية ولا قرص الطعمية .. ..

لك رؤيا بالنسبة لشهداء الثورة.!!!! .. ليسوا بشهداء واكرر ليسوا بشهداء ..مش معقول اللى هاجموا اقسام الشرطة وحرقوها وسرقوا السلاح وقتلوا الظباط ولما الظباط والعساكر جم يدافعوا عن ارواحهم وقتلوهم يبقى نسميهم شهداء..ازاى اللى هربوا من السجون واتقتلوا اثناء هروبهم يبقوا شهداء . حد يفهمنى لما شيخ الازهر والمفتى يصلوا على 19 جثة ملفوفين بعلم مصر.. على انهم شهداء ويطلعوا مسجلين خطر وهربانين من السجون..يبقى دول شهداء . ..

طيب وثوار ميدان التحرير!! انت عايز تفهمنى ان اللى بيحدفوا العساكر بالطوب والحجارة وقنابل الملوتوف دول ثوار ولما يقع منهم مصابين وقتلى يبقى دول شهداء .. طيب العساكر اللى بتتعور وتموت نسميهم ايه وهم عندهم اوامر بصد الشغب..واقفين للحفاظ على املاكى واملاكك مهوا ممكن يسيبوها .. متظاهرى احمد محمود ومجلس الوزراء واللى حرقوا المجمع واللى كانوا عايزين يحرقوا وزاره الداخلية ومجلس الشعب دول ثوار!! واللى يقع منهم يبقى شهيد دول مجرمين اللى عايزين يخربوا مصر..وبعدين من هو الشهيد زى ما الدين بيقول !! الشهيد هو من مات دون ارضه وعرضه وماله . طيب فين الارض ! الارض دى على الحدود مع اسرائيل مش ميدان التحرير وضد المصريين . وفين ماله اللى بيدافع عنه ده حرق الاقسام ومجمعات المحاكم والمجمع العلمى والسيارات اللى هى فى الاصل امواله بيحرقها .. وفين عرضه!! ده حتى عيب نتكلم فى المسألة دى يا مصريين . ..

يعنى انت كده ضيعت حق الشهداء والمصابين !! انت عايز تفهمنى ان اللى يموت شهيد يبقى له مطالب فى الدنيا امال بيموت شهيد ليه ويدفن بدمه عشان جزاءه فى الاخرة مش فى الارض . انا لما كنت نوباتجى فى المستشفى ايام الثورة كان بيجيلى ناس ويطلبوا منى تقارير طبية عن اصابات حصلتلهم قبل الثورة عشان ياخدوا بيها تعويض فى الهيصة بتاعت الثورة.. ..

يعنى انت كنت متواجد فى الثورة!! انا اعتبر نفسى واحد من الذين شاركوا فى نجاح الثورة ولكن من موقعى فى المستشفى فى استقبال المصابين من المتظاهرين والعساكر.. وكان ممكن الواحد يروح ويقعد فى البيت.. ولكن قررنا انا وزملائى التواجد المستمر فى المستشفى برغم خطورة الظروف والطوارئ التى كانت تمر بها البلاد وكانت كل حاجة مقطوعة عنا .وكان حظر التجوال مفروض والبلطجية من مسجلين وحرامية وقطاع طرق ملية الشوارع ..

ما رايك فى طريقة الانتخابات المتبعة حاليا .!!!! انا ح اقولك كلام ممكن يزعل البعض منى لكن ح اقوله .. مش كل واحد ينطبق عليه حق الانتخاب ..هوه صحيح الانتخاب بالبطاقة شئ صحى ولكن مش معقول ان واحد مراهق سياسيا نديله حق انتخاب من يقود البلاد.. ده بيبقى لسه خارج من مراهقة عاطفية او يمكن لسه فيها .. انا رأىى ان نقسم المجتمع الى ا و ب و ج .. الف له حق الانتخاب ب يجرى له اختبارات لقياس مدى وعيه السياسى و ج لا يحق له الانتخاب.. هذا رأىى..

اذن كيف سيكون تشكيل حكومتك اذا اصبحت رئيسا لمصر بص يا سيدى زى ما اتفقنا ان كل وزير ومحافظ ورئيس مجلس محلى ورئيس ادارة هو رئيس فى مكانه له كل اختصاصات رئيس الجمهورية فى تخصصه..زى ما لكل منا بطاقة رقم قومى لازم نعمل لكل واحد السيرة الذاتية له بموافقته يعنى رئيس جامعة حلوان لازم يبقى عندى تاريخه ومؤهلاته وسلوكه وكل حاجة عنه وبكده مش انا اللى ح اختار الشعب هو اللى ح يختاره وهكذا.. .. ..

كيفية اصلاح الحياة الاجتماعية للبلد..!!!! لازم كل مصرى يدوق حلاوة الحياة الجديدة بعد الثورة بعد ما عاش سنوات الجوع والمرض والذل والفقر والحرمان لازم كل مصرى يعرف حقه فى وطنه وما له وما عليه..كل مصرى له حق فى ارضه مصر.. كل مصرى له حق فى اموال مصر.. فى شواطئ مصر.. فى العمل فى مصر.. فى السكن فى بيوت مصر.. فى السفر والتمتع بالحياة داخل وخارج مصر ..فى الحج والعمرة للاراضى المقدسة .. كل ده ها يحصل من خلال دراسة عن موارد البلاد واحتياجتها فى الفترة القادمة ..

ما تصورك بالنسبة لطريقة وضع الدستور انا بسميه دستور يا اخواننا...بمعنى ان الاخوان هم اللى قرروا يحطوه .. وكل ما تيجى تكلم واحد منهم يقولك ده حقنا مش احنا جينا عن طريق الشعب ويقينا اغلبية .ولو كان الشعب عايز ناس تانيه تحط الدستور ليه انتخابنا .. يعنى هم واخدين الموضوع على انهم شعب الله المختار وباقى الشعب من قضاة ومستشارين ومحامين واساتذة جامعة فى الطراوة ..وهم اللى ياخدوا البرلمان ويشكلوا الحكومة ويحطوا الدستور والريس يبقى واحد شاطر منهم زى ما كان الحزب الوطنى بيعمل تمام وهم مش واخدين بالهم هما جم ازاى .. مكنش فيه بديل ..الشعب صحى من النوم ولاقاهم قدامه مع غياب كامل للأحزاب والقوى الثورية عن الشارع .الشعب قال ان الناس دى ها تتقى ربنا فيه وها تعوضه عن سنوات الذل والفقر والجوع والجهل والمرض .ها تقولى كانوا قريبين من الشعب وبيقدموا خدمات.. يعنى ايه خدمات .. صندوق النذور والتبرعات اللى الجوامع بتلمها تجيب قد الخدمات دى الف مرة .

وما هى طريقة وضع الدستور زى ما قلت قبل كده مسؤولية وضع الدستور من خلال مجلس الحكماء اللى هو بديل عن مجلس الشورى وهو اللى يرشح اعضاء وضع الدستور من جهابذة القضاة والمستشارين ذوى الكفاءة والخبرة فى وضع القوانين والدساتير وبعد كده نعرضه ع الشعب الذى يثق فى هؤلاء الحكماء والشعب يقرر الدستور ده يمشى معاه ولا لأ ..وبدون ان تستأثر به فئة منعرفش الناس ها ينتخبوها تانى ولا لأ..ولو تفتكر كلنا عملنا تعظيم سلام لما الناس انتخبت الاخوان والسلفيين ومحدش اعترض ..يبقى خايفين من ايه .

ورأيك فى الجمعية التأسيسية مع احترامى للجميع ابو تريكة يفهم ايه فى الدستور ومين احمد حلاوة ده اللى ها يحط دستور مصر .. المفروض ان كل واحد شايف رؤيا سياسية او صحية او رياضية معينة يكتبها فى ورقة ويبعتها لهيئة معينة وليكن لجنة وضع الدستور فى مجلس الشعب وبعدين اللجنة دى تجمع الاراء المختلفة وتبعتها على لجنة من الخبراء والقضاة لوضع دستور للبلاد على اساس هذه الاراء وبعد كده نعمل استفتاء شعبى وبعدين ها اكلمك بصراحة الناس اللى قاعدة خايفة من ايه .. هى حاجات معروفة خايفين من تعديل المادة التانية التى تخص الشريعة الاسلامية والغاء مجلس الشورى والخمسين بالمئة عمال وفلاحين وحقوق المسيحيين والمرأة.. يعن حاجات تتحل فى قعدة . لكن فيه ناس عايزانا نفضل ندور فى حلقة مفرغة ونسيب اهم طلبات الناس بحجة ان ده دستور اجيال الى مئة سنة ده ممكن مليونية تغير الدستور بعد شهر من اقراره ...

ما رأيك فى احوال الرياضة اولا دعنا نتفق ان الاندية المصرية احتكرت الرياضة لنفسها بدون رقيب ولا حسيب مما ادى الى النتائج المترضية فى كل الالعاب علاوة على اهدار المال فى شراء لاعبين واستقدام حكام اجانب لأدارة مباراة مصرية..الحل بسيط ومش معقد وهو اجبار هذه الاندية و ربطها بالمدارس لتخريج لاعبين فى كل الالعاب وجعل التفوق الرياضى ميزة للطالب والالعاب الرياضية مادة اساسية تجرى امتحناتها فى هذه الاندية اظن مفيش اسهل من كده ..

ذكرت موضوع السياحة!!! انت عندك ثروة الناس بتحسدك عليها..ومش عارف تستغلهاعشان عندك ادارات خربانة بتتصرف بطريقة عشوائية ومصلحتهم فوق كل اعتبار..لازم يبقى عندك مدارس متخصصة فى السياحة وموقعها جنب المناطق السياحية وخريجيها مميزون عن غيرهم يعنى لو اديت الخريج من هذه المدارس مرتب يعادل خمسة الاف شهريا وح تجبهم من عائد السياحة ..تفتكر كام واحد ها يخش هذه المدارس ولازم يكون عندك كتاب مدرسى سياحى..وتكون عندك خريطة سياحية للمناطق السياحية وتفكر ازاى تشغلها وتجيب منها دهب..ها اضربلك مثال صغير فيها ايه لو اعلنت عن مسابقة عالمية للصعود على الاهرامات..او شركات تتبنى سياحة المناطيد الهوائية فوق الاهرمات او عمل رحلات معارض للاثار المصرية فى الخارج وعودة المسابقات النيلية وتجميل نهر النيل وجعله مزارا سياحيا والترويج الاعلامى للسياحة فى مصر والاسراع فى انشاء متحف مصر الكبير وان يكون المسئولين عن الاثار ناس بتحب مصر من اصل فرعونى اصيل .

ازاى ها تلم موارد للدولة.!! اول شئ لازم نتفق على عودة الامان للشارع وعودة هيبه الشرطة واحترامها من قبل الشعب وقلت قبل كده ازاى التفاعل ده يبقى موجود ..اتكلمنا عن السياحة لأن اول حاجة بيفكر فيها السائح هو الامان فى البلد اللى ها يروحها .. وعندك 90% من اثار العالم يعنى كنز ومش عارفين قيمته عندك نهر النيل والسياحة النيلية بالبواخر واستغلال جيد لجانببى النيل من قعدات واكشاك سياحية وترفيهية وده غير المسابقات العالمية النيلية بتاعة زمان. ونرجع احتفلات عروس النيل وده غير الثروة السمكية فى نهر النيل وبحيرة ناصر وسياحة المناطيد..وخد عندك السياحة الشاطئية على البحر الاحمر والبحر المتوسط والثروة السمكية . واقامة مستعمرات صناعية كاملة لدول الصين والمانيا واليابان وبدل ما سجادة الصلاة والسبح الصينية تجيلنا احنا اللى نصدرها.ده غير قناة السويس . يا راجل ده لو قلت لكل مصرى فى الخارج ابعت 100 دولار وح نبقى نخصمها منك فى الجمرك الطاق طاقين لما تيجى شوف ها تلم كام مليار ..واعادة النظر فى تصدير الغاز بالسعر المنخفض مع احترامى لأبرام المعاهدات ..مع ترشيد المصاريف المهدرة على الادارات والمستشارين وحد اقصى للأجور وتمليك بعض القطاعات الخاسرة للعاملين فيها.. وتشجيع اقامة مدن صناعية جديدة وتسهيلات واعادة الثقة للمستثمرين .

علاقتك مع اسرائيل!!!! لازم نقر ونعترف ان اسرائيل امر واقع واسرائيل هى امريكا الشرق الاوسط واللى يقولك ح نرمى اسرائيل فى البحر ده بيضحك علينا وعلى نفسه وعايز يستفيد من الوضع القائم .. لازم نعترف بوجود اسرائيل وسطنا ولا بديل ألا لو كنا قدهم, متجيش وانت قزم وبتشحت الأكل والشرب وتشحت تسليحك ومعندكش التكنولوجيا الحديثة وتقول انا جدع ها اضربك وانت اضعف منهم لازم نعرف احنا فين وهم فين ونشغل الجمجمة. السادات كان بطل لما شغل الجمجمة وعمل المعاهدة وخد ارضه ولولا مقاطعة العرب الاغبياء كنا خدنا كل حاجة وحجمنا اسرائيل وحلينا المشاكل المتعلقة بفلسطين والقدس وانا مع السلام مع اسرائيل طالما المعاهدة بتقول كده ..ودعنى اكلمك بصراحة عشان تقف قدام اسرائيل لازم تمتلك قدرات صاروخية وتدميرية ومقاتلات جوية متقدمة ولو رجعت بالذاكرة ستجد ان اهم سبب فى نصر اكتوبر كان الضربة الجوية ثم تلاها القوات البرية .. ده كان زمان دلوقت قوة اى دولة مش قواتها البرية واحتلالها للأرض ولكن فى قدراتها الجوية وتسليحها النووى والصاروخى..يعنى حكاية زيادة اعداد الجيش فى سيناء وحماية الحدود امر غير منطقى وغير علمى كما يروج البعض بألقاء اسرائيل فى البحر.. وأوضح أنه لو لدى فرقة برية أو اثنتين أو حتى عشره فى سيناء، فلا قيمة لها على الإطلاق، مادام ليست لدى قدرات تدميرية أخرى ذات مستوى رفيع من الصواريخ والمقاتلات والطائرات المدمرة.. ..

وموضوع تصدير الغاز لأسرائيل لا يوجد نص فى الاتفاقية يبيح تصدير الغاز ولكن بالرجوع للاتفاقية يوجد بند ينص على التبادل الاقتصادى للسلع بين مصر واسرائيل ولم يحدد سلعة معينة..اذن قرار التصدير هو امر سيادى وفيه مصلحة ما ..فهناك قول بأن الغاز لا يخزن فى الارض وتخزينه فى مستودعات يحتاج موارد ضخمة لتسيله..وقول اخر ان تصدير الغاز لتسديد جزء من مديونيتنا ,وتصديره لدول اخرى غير الاردن واسرائيل عبر السفن مكلف ويتم تصديره فى صورته الاولية .وقول اخر ان التصدير لأسرائيل هو مرحلة اولى تليها الامتداد بالانابيب الى دول اخرى بعيدة .وقول اخر بأن اسرائيل حصلت على الغاز بهذا السعر لوجود العمولات التى كانت تدفع من تحت الترابيزة، وأصحاب العمولات يحاولون ربط الاتفاقية بالأمن القومى المصرى والتزامات مصر تجاه كامب ديفيد للتغطية على فسادهم. .

هل ترى ان اتفاقية تصدير الغاز لأسرائيل فساد ام خيانة! هذه الاتفاقية نموذج للفساد الذى يصل إلى حد الخيانة العظمى، فإسرائيل «عدو» حتى مع وجود اتفاقية سلام، فهى على الأقل عدو محتمل ومنافس لمصر فى المنطقة، ويوجد نوع من التزاحم على النفوذ فى المنطقة، فكيف لمصر أن تدعمها بالغاز الطبيعى الذى يعد ملكاً لهذا الشعب. بل وأقل من التكلفة، هذا يعد نوعاً من المساعدة والدعم الواضحين للكيان الصهيونى، ولو فرض أن الاتفاقية تلزم مصر بنص صريح بتصدير الغاز، فهل تلزمها بتصديره بأقل من سعر التكلفة؟ الاتفاقية يختلط فيها الفساد بالخيانة. الاتفاقية غير مرتبطة باتفاقية السلام، فأثناء توقيع اتفاقية كامب ديفيد عام ١٩٧٩ لم تكن مصر دولة منتجة للغاز آنذاك الاتفاقية وقعت عام ٢٠٠٥ وألزمت مصر بأن تصدر لإسرائيل حوالى ١.٧ مليار متر مكعب سنويا من الغاز لمدة ٢٠ سنة، وسعر كان واحد ونصف دولار للمليون وحدة بالرغم ان تكلفة إنتاج المليون وحدة حرارية ٢.٦٥ دولار و تم تكليف شركة غاز شرق المتوسط بمد خط الغاز لأسرائيل بطول ١٠٠ كيلومتر من العريش لنقطة عسقلان على البحر المتوسط جنوب فلسطين، وهى شركة مملوكة لأربعة شركاء هم حسين سالم ومجموعة ميرهاف الإسرائيلية وشركة أمريكية إسرائيلية، وشركة «بى تى تى» التايلاندية المملوكة لرجل أعمال أمريكى -يهودى يدعى سام زل.. وهذا هو الجزء الأكثر سواداً فى الاتفاقية تعدد جنسيات الشركاء. باختصار هذه الاتفاقية ضد الأمن القومى المصرى فنحن ندعم منافساً إقليمياً، والأمن القومى المصرى مقتضاياته تتطلب عدم تصدير أى منتج لمنافس إقليمى. إضافة إلى كونه أقل من تكلفته. ..

ما رأيك فيما نسب لمرشحى الرئاسة على استعدادهم لألغاء معاهدة السلام بين مصر واسرائيل.!!!! لماذا تلغى إذا كانت حققت مكاسب ضخمة أولا انسحاب إسرائيل من ٦٠ ألف كيلومتر مربع فى سيناء، وتفكيك كل المستوطنات ..وعودة كل حقول البترول الموجودة فى سيناء وبدء التنمية والاستثمارات فى مصر بعد أن كان يخصص جزء كبير من الدخل القومى للمجهود الحربى .يعنى اللى يقول كده بيقع فى هرطقة سياسية واحب اوضح ان فسخ الاتفاقية سيؤدى الى خسارة المجتمع الدولى وايضا التحكيم الدولى .

بخصوص الجامعة العربية ايه رأيك .!!!! الغاء .. الغاء .. الغاء..فى الماضى كانت لا اسمع لا ارى لا اتكلم وندين ونشجب ولا نسمح واليوم يلا فركيشة.. الله يسامحوا بقى.انا بسميها جامحة الدول العربية لأنه جمحت بالعرب وغرقتهم فى شبر مية.. وكان كل اجتماع يطلع اللى يقولك اندال يا عرب اندال..لو كانت جامعة بجد كانت يبقى ليها عملة موحدة وحدود مفتوحة وتجارة حرة واستثمارات عربية خالصة واستفيد بأرض السودان الخضراء ومياه البحار الزرقاء والصحراء الصفراء وموارد البترول فى انتاج الطاقة والغاز ويغطى كل البلدان العربية..كتير علينا يبقى لينا جيش عربى قوى زى الناتو .كتير علينا وجود زعيم عربى زى عبد الناصر لعلمك بقى ضعف الجامعة العربية هو ما ادى الى اشتعال الثورات العربية فى ظل حكام ظالمين لا يهمهم غير التوريث والبقاء فى الحكم على اجساد شعبهم.

ما هو تعليقك على حل مجلس الشعب!! الحقيقة المرة لازم الواحد يعرفها .ما بنى على باطل فهو باطل..تهافت الاخوان على السلطة ادى بنا الى السقوط لهم ولنا استعجالهم على اجراء الانتخابات مجلس الشعب بدون وضع الستور ادى الى سقوطهم المريع وطبعا ه>ا التسرع خلاهم يحطوا ناس معندهاش فكرة يعنى ايه مجلس شعب وكلنا شاف المستوى المتدنى فى طريقة الحوار او القاء البيانات .مجلس الشعب المفروض يبقى مسؤول عن حاجتين فقط ليس لهم تالت الاول مراقبة اداء الحكومة ومحاسبتها والتانى مشاكل الدائرة اللى انتخبتهم ويبقى تحت قيادتهم المجلس المحلى يعنى المواطن يشتكى والمجلس المحلى يسمع ويوصل الى عضو مجلس الشعب عن الدائرة .. اما التشريع وسن القوانين دى مسؤولية الحكومه ومجلس الحكماء زى ما قلنا ..

وتأسيسية الدستور انت شايف ايه ! برضه ح نقول .ما بنى على باطل فهو باطل..مين اللى بيعمل الدستور اعضاء من مجلس الشعب المنحل بقرار محكمة دستورية ا>ن فهم ليس لهم اى حق فى وضع الستور ..ببساطة ها يطعن عليه من اى واحد بيفهم بعدم الدستورية ..

انت قلت من ضمن البرنامج حكاية ثلاث افدنة لكل اسرة ..معلش ازاى يعنى! عندك الظهير الصحراوى وارض سينا لو قلتلك ها اديك ثلاث افدنة فيها بتوعك ملك لك وروح حوطها بسور طبعا ه ترد طيب فين المية والنور..شوف .. بمجرد ان يكون عندك املاك فى ارض مصر ستشعر بألانتماء للبلد وعلى الاقل ه تسافر مرة شهريا للأطمئنان عليها..ولما تكون هذه القطعة من ضمن عدة قطع فى كمبوند كامل سيكون حافز للتطوير ولما تقع هذه الكمبودانات على شيكة طرق يبقى المشكلة اتحلت انا ه اديك الارض وانت حر. وامريكا طلعت ازاى .ز المهاجرين هجموا على الارض وكل واحد حط عصاية وبقت ارضه وظهرت امريكا على وش الارض ومكنش فيه نور ولا مية المهم البداية..واحنا بنحسد من استولوا على الطريق الصحراوى بين مصر واسكندرية واتهمناهم بالنصب على الدولة وهم فى الاصل حولوها الى ارض زراعية واستثمار سياحى.بس خلاص...

من وجهة نظرك ان الاطاحة بمرسى كان انقلاب عسكرى...!!! نعم الاطاحة بمرسى كان انقلاب عسكرى بأرادة شعبية يغلفها قوى ثورية ويقويها ممثلى الامة من المعارضة وشيخ الازهر والبابا تواضروس والقضاة والاعلام..اذن انت امام حشد جماهيرى معارض لبقائك فى الحكم..فماذا انت فاعل.. ..

ولكن هذا لم يحدث مع مبارك..!!! مين قالك ده..انت لا تعلم ما وراء الكواليس..اللى حصل ثورة شعبية وانقلاب عسكرى ايضا ولكن حفظا لماء الوجه ولأن مبارك ابن الجيش تم تكليف الجيش بأدارة شئون البلاد ويكون مشهد تسليم السلطة سلمى وبدون مواجهات وتم حبس مبارك واولاده ولم يحدث مواجهات دامية كالتى تحدث الان والسبب العناد وراء الكواليس مما ادى الى اجبار الرئيس على التنحى والاساس فى كلتا الحالتين هو الثورة الشعبية..